Di navbera 2 û 8ê Cotmehê de, rejîma sîyonîst û milîsên Cihû li Şerîaya Rojava ya îşxalkirî 2 hezar û 40 êrîş pêk anîn. Di encama van êrîşan de 3 Filistînî hatin şehîdkirin, 121 kes birîndar bûn û 254 kes hatin revandin.

Rapora heftane ya Navenda Agahdariya Mu'ta li Filistînê eşkere kir ku êrîşên ku Filistînî li Şerîaya Rojava ya îşxalkirî rastî wan tên, çiqas zêde bûne. Li gorî raporê, îxlalkirinên ku ji aliyê hêzên îşxalker ên sîyonîst û çeteyên cihûyan ve hatine kirin, bûne sedema mirina mirovan, her wiha serdegirtinên malan, wêrankirina milk û sînordarkirinên li ser jiyana rojane.

Di raporê de hat diyarkirin ku di wê hefteyê de 3 Filistînî şehîd bûn, 121 kes birîndar bûn û 254 kes jî hatin desteserkirin.

Serdegirtina malan û hilweşandin berdewam dike

Hêzên îşxalkerên ên sîyonîst di nav hefteyê de li bajar, bajarok û gundên Şerîaya Rojava 313 serdegirtin pêk anîn. Di van serdegirtinan de, 149 mal hatin lêgerîn û dest danîn ser milk û wesayîtên Filistîniyan.

Di raporê de hat destnîşankirin ku 113 milk û wesayît hatine desteserkirin û 84 avahî an tesîsên giştî û taybet hatine hilweşandin an jî wêrankirin. Di nav îxlalkirinan de kiryarên ku bûne sedema koçberkirina bi darê zorê ya hinek Filistîniyan jî hene.

Navenda Agahdariya Mu'ta di heman heyamê de 321 êrîşên çeteyên Cihû yên sîyonîst li dijî Filistîniyan belge kir. Li gorî raporê, van êrîşan can, milk û çalakiyên çandiniyê yên Filistîniyan hedef girtine. (ÎLKHA)