Berdevkê Wezareta Karên Derve ya Îranê Îsmaîl Beqayî, di daxuyaniya xwe ya li ser hesabê xwe yê medyaya civakî de, nûçeyên ku dibêjin hinek welat dikarin li hember zextên Emrîkayê yên ji bo destwerdana li Tengava Hurmizê serî bitewînin, nirxand.

Beqayî di daxuyaniya xwe de amaje bi gotineke pêşiyan a Koreyî kir û wiha got: "Lingên çivîka ku hewl dide li pey leglegê bifire, dişkên."

Beşdarbûna çalakîyên êrîşkar li dijî hiqûqê ye

Beqayî diyar kir ku welatên rasterast an nerasterast beşdarî her hewldaneke ku piştgiriya leşkerî an lojîstîkî ya li dijî Îranê dihewîne bibin, ew ê wekî helwesteke dijminane werin nirxandin û wê ji encaman berpirsiyar bên girtin. Wî parast ku şandina yekîneyên behrî, personelên leşkerî an kelûpelên piştgiriyê tê maneya hevkariya ligel êrîşkariya Emrîkayê.

Amajeya bi biryarên NYyê û hişyariya berpirsiyariyê

Beqayî da zanîn ku ev hewldan li dijî benda 4emîn a maddeya 2yemîn a Peymana Neteweyên Yekbûyî (NY) ne û di çarçoveya biryara hejmar 3314 a Lijneya Giştî ya NYyê de dikarin wekî çalakiya êrîşkar bên nirxandin. Wî tekez kir ku hincetên wekî "temînkirina ewlehiya veguhastina deryayî" an "têkoşîna li dijî korsaniyê" wê vê rewşê neguherînin.

Beqayî herwiha destnîşan kir ku peymanên dualî yên bi Emrîkayê re mafê îxlalkirina hiqûqa navneteweyî nadin tu welatî û bang li dewletan kir ku pabendî prensîbên hiqûqa navneteweyî bimînin. (ÎLKHA)