Tevgera Berxwedana Îslamî ya Filistînê (HAMAS), Daxuyanîya naskirina Dewleta Filistînê ya ji teref Serokkomarê Fransayê Emmanuel Macron ve hatibû daxuyandin bi kêfxweşî pêşwazî kir.

Di daxuyaniya xwe de, Hamasê ev gav erênî bi nav kir û diyar kir ku ew di warê temînkirina edaletê de ji gelê Filistînî yê bindest re gaveke rast e.

Her wiha tevgerê diyar kir ku ev gav piştgirî dide mafê rewa yê gel ê diyarkirina çarenûsê û mafê avakirina dewleteke serbixwe ya Filistînî, û bal kişand ku divê Qudsê paytexta vê dewletê be.

Tevgerê diyar kir ku helwesta Fransayê pêşketineke sîyasî ya girîng e, ku baweriya civaka navneteweyî ya li ser rewatiya doza Filistînê nîşan dide û têkçûna hewldanên rejîma îşxalker ên ji bo tahrîfkirina rastiyan an astengkirina îradeya gelên azad nîşan dide.

HAMAS bang li hemû welatên cîhanê, bi taybetî welatên Ewropî kir ku hêna jî Dewleta Filistînê nas nekirine, ku rêya Fransayê bişopînin. HAMASê tekez kir ku pêwîst e hemû mafên neteweyî yên gelê Filistînê, di nav de mafê vegerê, mafê diyarkirina çarenûsê û mafê avakirina dewletek serbixwe û serwer, werin naskirin.

HAMAS her wiha destnîşan kir ku gavên navneteweyî yên bi vî rengî zexta siyasî û exlaqî li ser îşxalkerê siyonîst diafirînin, ku qirkirin, birçîbûn û êrîşên xwe yên li dijî gelê Xezzeyê û çalakiyên xwe yên îşxalkirin û bicihkirinê li Şerîaya Rojava û Qudsê didomîne. (ÎLKHA)