Serokkomarê Fransayê Emmanuel Macron ragihand ku ew amadekariyan dikin ku Filistînê wek dewlet nas bikin.

Macron diyar kir ku ew ê di daxuyaniyekê ku dê di meha Îlonê de li Civata Giştî ya Neteweyên Yekbûyî were kirin de, Filistînê wekî dewletek nas bikin û got,  "Li gorî pabendbûna me ya dîrokî ya ji bo aştiyek dadperwer û mayînde li Rojhilata Navîn, min biryar da ku Fransa Dewleta Filistînê nas bike. Ez ê di meha Îlona ku were de li Civata Giştî ya Neteweyên Yekbûyî daxuyaniyek fermî bidim. Pêdiviya lezgîn a îro ew e ku şerê li Xezzeyê bi dawî bibe û nifûsa sivîl were rizgarkirin."

Macron di hesabê xwe yê X de daxuyaniya xwe wiha domand: "Aştî mimkun e. Divê em tavilê agirbestekê pêk bînin, hemû êsîran serbest berdin û alîkariyeke mirovî ya mezin bidin gelê Xezzeyê. Her wiha divê em bêçekkirina Hamasê garantî bikin, Xezzeyê ewle bikin û ji nû ve ava bikin. Di dawiyê de, divê em Dewleta Filistînê ava bikin, karîgeriya wê garantî bikin û bi qebûlkirina bêçekkirina wê û bi tevahî naskirina îsraîlê, beşdarî ewlehiya her kesî li Rojhilata Navîn bibin.

Alternatîfeke din tune. Fransayî li Rojhilata Navîn aştiyê dixwazin. Ev yek bi me, Fransayî, îsraîlî, Filistînî û hevkarên me yên Ewropî û navneteweyî ve girêdayî ye ku em nîşan bidin ku ev gengaz e. Bi saya sozên ku Serokê Desthilata Filistînê daye min, min ji wî re nameyek nivîsand û biryardariya xwe ya ji bo pêşveçûnê diyar kir. Bawerî, vekirîbûn û pabendbûn. Em ê aştiyê bi dest bixin," (ÎLKHA)