Serokê Emrîkayê Donald Trump rexne li hevalbendên NATOyê girt û got ku hinek welatên Ewropî di şerê Îranê de piştgirî nedane Washingtonê. Trump her wiha peyamek da ku heke pêwîst be, ew dikare alîkariya endamên NATOyê red bike.

Serokê Emrîkayê Donald Trump nîqaşên li ser parvekirina barê di nav NATOyê de ji nû ve gur kir, û îddîa kir ku hinek hevalbendên Ewropî di dema şerê li dijî Îranê de ligel Washingtonê nesekinîn.

Trump beriya serdana Sekreterê Giştî yê NATOyê Mark Rutte bo Washingtonê axivî û got ku Emrîkayê bi salan e çavkaniyên girîng ji bo ewlehiya Ewropayê xerc kiriye lê di berdêla wê de piştgiriyek têrker negirtiye.

Trump diyar kir ku heke pêwîst be ew dikare red bike ku alîkariya hinek welatên endamên NATOyê bike û got, "Me ewqas pere xerc kir. Paşê dema ku em ji bo mijarek piçûk alîkariyê dixwazin, ew dibêjin, 'Na, em naxwazin alîkariyê bikin.'"

Serokê Emrîkayê, bi taybetî behsa Brîtanya, Elmanya û Îtalyayê kir û îddîa kir ku ev welat di dema şerê li dijî Îranê de li kêleka Washingtonê nesekinîn. Lêbelê, Trump hûrgilî neda ka çi cure piştgirî ji van welatan hatiye xwestin. (ÎLKHA)