Sekreterê Konseya Bilind a Ewlekariya Neteweyî ya Îranê, Muhsîn Rezaî, di daxuyaniyekê de derbarê têkiliyên berdewam ên bi Washingtonê re got ku divê heft şertên ku berê Tehranê diyar kiribûn werin qebûlkirin û bang li Emrîkayê kir ku dev ji "çêkirina nûçeyên derew li ser mizakereyan" berde.

Rezaî di daxuyaniyekê de li ser hesabê xwe yê medyaya civakî got ku divê Emrîka şertên Tehranê ji bo bidawîanîna şerê bi Îranê re qebûl bike. Karbidestê Îranî diyar kir ku pêvajoya mizakereyan divê li ser bingeha şertên ku welatê wî berê ragihandiye be.

Pêşniyara heft xalî ya Tehranê berê agirbest, berdana mal û milkên cemidî yên Îranê, rakirina dorpêçên li ser sektora petrolê, bidawîanîna dorpêça deryayî ya Emrîkayê, tazmînatên şer, vekişîna hêzên Emrîkayê ji herêmê û bidawîanîna tehdîd û destwerdanan dihewîne.

Rezaî berê diyar kiribû ku Îran heta şertên wê neyên bicîhanîn, Tengava Hurmuzê ji nû ve venake. Hat ragihandin ku Îranê van mercan wekî pêşşertek ji bo danûstandinan û vekirina tengavê dîtiye.

Helwesta Îranê ji nêzîkatiya Emrîkayê ya li hember mizakereyan pir cuda ye. Her çend Washington dixwaze ku pirsgirêkên navokî di merhaleyên destpêkê yên mizakereyan de werin çareserkirin jî, Tehran daxwaza rakirina dorpêçê, sivikkirina dorpêçan û pêkanîna daxwazên xwe yên aborî dike.

Karbidestên Îranî dibêjin ku ew deriyê dîplomasiyê vekirî dihêlin, di heman demê de tekez dikin ku amadekariyên leşkerî jî berdewam dikin. Bi vî awayî, Tehran di heman demê de pêvajoya mizakereyan didomîne û ji şertên xwe yên derbarê Tengava Hurmuz û dorpêçan de paşve gav navêje. (ÎLKHA)