Di xwepêşandanên ku li Kamerûnê piştî ragihandina serkeftina serokê muxalefetê Issa Tchiroma Bakary di hilbijartinên serokatiyê de dest pê kirin de, çar kes hatin kuştin.

Berî ku encamên fermî yên hilbijartinên serokatiyê werin ragihandin, di xwepêşandanên li Douala, bajarê herî mezin ê Kamerûnê de herî kêm çar kes hatin kuştin.

Parêzgarê Herêmê Samuel Dieudonné Diboua diyar kir ku xwepêşanderan êrîşî qereqolên polêsan kirin û hêzên ewlehiyê wan diparêzin.

Dîboua got , "Çar kesan canê xwe ji dest dan û gelek endamên ewlehiyê birîndar bûn."

Bi sedan alîgirên serokê muxalefetê û namzetê serokatiyê Issa Tchiroma Bakary li gelek bajaran daketin kolanan û tevî qedexeya xwepêşandanan li seranserê welat, bi hêzên ewlehiyê re pevçûn.

Tchiroma Bakary îddîa kir ku wî di hilbijartinên serokatiyê de bi ser ketiye û daxwaz kir ku Serok Paul Biya, ku 43 sal in li ser desthilatê ye, têkçûna xwe qebûl bike.

Partiya Tevgera Demokratîk a Gel (CPDM) ya Biya vê îddîiayê red dike.

Li bajarê Garoua yê li bakurê welat, polesan ji bo belavkirina xwepêşanderan gaza rondikrêj û topên avê bikar anîn.

Xwepêşanderan pankartên ku partiya desthilatdar bi "dizîna serkeftinê" sûcdar dikirin, hilgirtin. 

Rayedaran heta roja Duşemê, ku tê payîn Konseya Destûra Bingehîn encamên hilbijartinê eşkere bike, hemû xwepêşandanên girseyî li welat qedexe kirine. (ÎLKHA)