Wezareta Karên Hundir û Ewlekariya Neteweyî ya Xezzeyê ragihand ku Serheng Ehmed el-Kudra, Serokê Micadeleya bi Tiryakê re û Endamê Konseya Fermandariya Polêsan, li Xan Yûnisê di êrîşeke asmanî de şehîd bûye.

Rejîma sîyonîst berdewam e li ser hedefgirtina avahiya ewlehiyê li Xezzeyê.

Di daxuyaniyekê ku ji teref Wezareta Karên Hundir û Ewlekariya Neteweyî ya Xezzeyê ve hatiye dayîn de, hatiye ragihandin ku Albay Ehmed Ebdul Îbrahîm el-Kudra (44) ê Serokê Daîreya Têkoşîna li dijî Narkotîkan û endamê Konseya Fermandariya Polêsan di êrîşa hewayî ya li ser Xan Yûnisê de şehîd bûye.

Wezaretê ev kuştin bi tundî şermezar kir û tekez kir ku fermandarê şehîd el-Kudra di seranserê şerê qirkirinê de li ser erkê xwe ma û qet dev ji xizmeta gelê Xezzeyê berneda.

Di daxuyaniyê de hatîye gotin ku ev êrîş beşek ji sîyaseta rejîma sîyonîst e ku bi awayekî sîstematîk polês û avahiya ewlehiyê li Xezzeyê hedef digire.

Di daxuyaniyê de hat gotin, "Plana dagirkeriyê ya afirandina kaos û valahiyek ewlehiyê bi êrîşên wiha dê pûç bibe." û hat destnîşankirin ku Wezareta Karên Hundir dê bi hemî yekîneyên xwe ewlehiya navxweyî peyda bike û planên dagirkeriyê dê werin astengkirin.

Wezaretê tekez kir ku tevî bedelên giran ên hatine dayîn jî, cepheya berxwedanê ya Xezzeyê wê neheje. (ÎLKHA)