Berdevkê Hêzên Çekdar ên Tevgera Ensarullah a Yemenê, Yahya Serî, derbarê êrîşa mûşekî ya li ser axa îşxalkirî de daxuyaniyek da.

Di daxuyaniyê de, ku bi bîranîna ayeta "Ey bawermendan! Heke hûn alîkariya Xwedê bikin, ew ê alîkariya we bike û we xurt bike" dest pê kir, hate gotin ku balafirgeh, xalên leşkerî û stratejîk hatine hedefgirtin.

Serî tekez kir ku piştgiriya ji bo gelê Xezzeyê dê berdewam bike û got, "Li hember zilma ku li ser gelê Filistînê û mucahîdên wan ên hêja û sûcên qirkirin û birçîbûnê yên ku ji hêla dijminê sîyonîst ve li Xezzeyê hatine kirin, hêza mûşekî ya hêzên çekdar ên Yemenê bi mûşekek balîstîk a hîpersonîk a celebê 'Filîstîn-2' operasyonek leşkerî ya kalîfîye pêk anî ku Balafirgeha Lod a li herêma Yaffayê ya îşxalkirî hedef girt."

Serî diyar kir ku hedef bi serkeftî hatine lêdan û got, "Ev mûşeka pêşketî bi serkeftî ji pergalên parastina hewayî yên rejîma sîyonîst derbas bû û gihîşt hedefa xwe. Di nav refên dijmin de panîk û kaosek mezin çêkir. Bi mîlyonan hêzên sîyonîst ên îşxalker neçar man ku birevin veşartgehên xwe û operasyonên balafirgehê hatin sekinandin. Wekî din, yekîneya balafirên bêmirov ên Hêzên Çekdar ên Yemenê du operasyonên cuda li axên Filistînî yên îşxalkirî pêk anîn, yek hedefa leşkerî û ya din jî hedefa stratejîk bû. Ev hedef li herêmên Yaffa û Eskalanê bûn û her du operasyon jî bi kerema Xwedê serkeftî bûn."

Serî tekez kir ku ew ê piştgiriya xwe ya ji bo Xezzeyê bidomînin û wiha got:

“Hêzên çekdar ên Yemenê û gelê esilzade yê Yemenê bi rêzgirtinek mezin qehremanî û fedakariya birayên me yên mucahîdên ku li Xezzeyê berxwedanek destanî didin silav dikin. Ew careke din radigihînin ku ew li kêleka van mêrxasên wêrek in ku bi can û çavkaniyên xwe li cepheyên pêş ji bo şeref, rûmet û pîrozîya Ummetê radiwestin. Hezar silav ji wan re! Û bila xew nekeve çavên tirsonekan! Yemen, bi gelê xwe yê dilsoz, artêşa xwe ya mucahîd û serokatîya xwe ya dilsoz, heta ku ev zilm biqede û dorpêç were rakirin, li kêleka gelê Xezzeyê radiweste. Xwedê ji me re bes e; ew çi parêzvanek ecêb, çi wekîlek ecêb û çi alîkarek ecêb e. Bijî Yemenek serbixwe û bi rûmet! Serkeftin a Yemenê ye, serkeftin a kurên azad ên Ummetê ye!” (ÎLKHA)