Philippe Lazzarini, Komîserê Ajansa Alîkarî û Kar a Penaberên Filistînî ya Neteweyên Yekbûyî (UNRWA), daxwaza lêpirsînek berfireh û serbixwe li ser mirina zêdetirî 310 personelên li Xezzeyê kir.

UNRWA daxwaza lêpirsîneke serbixwe û zelal li ser mirina zêdetirî 310 karmendên wê yên ku li Xezzeyê hatine kuştin kir. Komîserê UNRWA Philippe Lazarini tekez kir ku divê trajediya ku bi mirina karmendê wan Kamel, ku di meha Adarê de "li cihê bûyerê" hat îdamkirin, derket holê, di zûtirîn dem de were ronîkirin.

Kemal zêdetirî 20 salan li UNRWAyê xebitî. Tevî ku çakêt û wesayîtek bi nîşana Neteweyên Yekbûyî hilgirtibû, demek kurt piştî ku ew di 23ê Adarê de ji mala xwe derket, peywendî bi wî re qut bû. Paşê cenazeyê wî di goreke komî de, li kêleka mayînên ekîbên Heyva Sor a Filistînî yên ku ji teref îşxalkeran ve hatibûn qirkirin, hat dîtin. UNRWA got ku Kamel bi gelek lêdanan li serê xwe hatiye kuştin.

Lazzarinî got, "Mirina Kamel ne tenê ji bo malbat û ajansa me, lê di heman demê de ji bo civaka navneteweyî jî nayê qebûlkirin. Divê hemû hevkarên me yên ku li Xezzeyê canê xwe ji dest dane li ber edaletê hesab bidin."

Ofîsa Mafên Mirovan a Neteweyên Yekbûyî êrîşên hêzên îşxalker ên li ser tîmên alîkariya bijîşkî û rizgarkirina mirovî wekî "sîstematîk û tirsnak" bi nav kir û got ku ev kiryar li dijî qanûna navneteweyî ne. Rêxistinê destnîşan kir ku "înfazên li cihê bûyerê" û kuştinên keyfî yên bi vî rengî wekî sûcên şer têne hesibandin.

Windabûna karmendên UNRWA li Xezzeyê di nav rêjeyên herî bilind ên qurbaniyên sivîlan di dîroka Neteweyên Yekbûyî de ye. Lazzarini her wiha got, "Ji bo ku ev trajediya careke din çênebe, lêpirsînên tam, serbixwe û bêalî hewce ne." (ÎLKHA)