Rêberê Mezin ê Şoreşa Îslamî ya Îranê, Ayetullah Seyyîd Mucteba Xameneî di peyamekê de ku bi minasebeta 13ê Ebanê hatiye belavkirin, li dijî Emrîkayê tekezî li ser pêwîstiya berdewamiya berxwedanê kir.

Bi minasebeta 13ê Ebanê, Roja Têkoşîna Neteweyî ya salane ya li dijî Emperyalîzma Cîhanî li Komara Îslamî ya Îranê, Rêberê Bilind ê Şoreşa Îslamî ya Îranê, Ayetullah Seyyîd Mucteba Xameneî peyamek nivîskî weşand. Di daxuyaniya xwe de, Xameneî diyar kir ku 13ê Ebanê wekî yek ji sembolên têkoşîna di navbera rastî û derewê de tê dîtin û tekezî li ser pêwîstiya berxwedana berdewam li dijî Emrîkayê kir.

Xameneî di peyama xwe de rexne li sîyasetên Emrîkayê yên li hember Komara Îslamî ya Îranê yên di salên borî de girt û diyar kir ku gelê Îranê li hember zextên derve paşve gav neavêtiye. Wî diyar kir ku hewldanên ji bo têkbirina serxwebûn û îradeya sîyasî ya welat her tim rastî berxwedana civakê hatine.

Xameneî bal kişand ser pêşketinên dawî yên li herêmê û diyar kir ku gavên ku Komara Îslamî ya Îranê ji bo parastina berjewendiyên xwe yên stratejîk avêtine rewa ne. Xameneî hişyarî da ku ger aloziyên herêmî zêde bibin, dibe ku pêşketinên berfirehtir çêbibin û girîngiya xurtkirina şiyanên parastinê û astengkirinê yên welat tekez kir.

Di peyamê de behsa pêşketinên li Filistîn, Lubnan, Iraq û Yemenê jî hat kirin û hat destnîşankirin ku tevgerên berxwedanê yên li herêmê di têkoşîneke hevpar de ne. Xameneî tekez kir ku ji bo pêşeroja welat, divê modelek pêşketinê ya ku aboriyek bihêz, teknoloji, parastin û hevgirtina civakî dihewîne, were parastin.

13ê Ebanê li Îranê wekî salvegera êrîşa xwendekaran a sala 1979an a li ser Balyozxaneya Emrîkayê li Tehranê û krîza rehîneyan a piştî wê tê bîranîn. Li seranserê welat her sal xwepêşandan û bernameyên dijî-Amerîkî têne lidarxistin. (ÎLKHA)