Rêberê Şoreşa Îslamî ya Îranê Ayetullah Elî Xameneî di yekem daxuyaniya xwe ya piştî êrîşên dawî de peyamên tund da Emrîka û rejîma sîyonîst. Xameneî got, "Divê Emrîkayî bizanin ku miletê Îranê teslîm nabe. Midexeleya Emrîkayê ew ê zirarên bêberamber bide."

Xameneî di peyamekê de ku îro nîvro li ser televîzyonê hate weşandin de, helwesta bi rûmet, wêrek û hişmend a gelê Îranê li dijî êrîşa pir bêaqil û xiyanetkar a dijminê sîyonîst pesnê xwe da û diyar kir ku ev nîşana gihîştin û ruhanîyeta milet e.

Xameneî di berdewama axaftina xwe de bi bîr xist ku gelê Îranê çawa di demên berê de li hember şerekî ferzkirî li ber xwe da û got, "Çawa ku miletê Îranê li hember şerekî ferzkirî li ber xwe da, ew ê li hember aştiyeke ferzkirî jî li ber xwe bide. Ev milet li hember tu ferzkirinê serî natewîne."

Ayetullah Xameneî jî bertek nîşanî daxuyaniyên tehdîdwarî û asta nizm ên Serokê Emrîkayê da û got, "Tu kesekî aqilmend ku Îran, gel û dîroka wê nas dike, bi zimanê tehdîdane bi wî gelî re naaxive. Çîmkî ku miletê Îranê teslîm nabe. Divê Emrîkayî bizanin ku bê guman her destwerdana leşkerî ya Emrîkayê ew ê zirarên bêberamber çêbike."

Xameneî tevgera mezin a gelê Îranê bi meşên Roja Xedîrê û bi taybetî xwepêşandanên piştî nimêja înê pesnê xwe da û berteka pêşkêşvaneke televîzyonê ya jin a li hember êrîşa dijmin bi bîr xist û got ku ji bo pêşkêşvaneke jin bûyerek pir hêja û dîrokî ye ku tekbîrê bixwîne û hêza neteweyê nîşanî cîhanê bide.

Xameneî bal kişand ser dema êrîşa rejîma sîyonîst û got ku ev êrîş di demekê de pêk hat ku rayedarên Îranî danûstandinên nerasterast bi Emrîkayê re dikirin û ti nîşanên kiryarên tund an leşkerî yên Îranê tune bûn.

Xamaneî diyar kir ku di destpêkê de hinek texmîn li ser rola Emrîkayê di vê êrîşê de hebûn û tekez kir ku daxuyaniyên dawî yên rayedarên Emrîkayî van şibheyan xurttir kirine.

Xameneî di berdewama axaftina xwe de weha got:

"Gelê Îranê dê li dijî hemû ferzkirinan, çi şer be, çi aştî be, çi jî her cûreyek din be, li ber xwe bide. Ez ji rewşenbîr, nivîskar û bi taybetî ji wan kesên ku bi raya giştî ya cîhanî re têkilî datînin dixwazim ku van wate û têgehan bi zelalî îfade bikin û nehêlin ku rastî ji hêla propagandaya xapînok a dijmin ve were tahrîfkirin."

Rêberê Îranê, ku diyar kir ku sîyonîst dijmin şaşiyeke mezin û kuştinek kiriye, got ku divê ev dijmin bê guman were cezakirin û jixwe tê cezakirin. Xameneî destnîşan kir ku bersiva ku ji hêla gel û hêzên çekdar ên Îranê ve hatiye dayîn û ew ê ku were dayîn "cezayek giran" e û ev ceza rejîma sîyonîst ziîf dike.

Xameneî tekez kir ku beşdarbûna Emrîkayê di meydanê de nîşana ziîfbûna rejîma sîyonîst e û got ku banga Serokê Emrîkayê ji gelê Îranê re ji bo teslîmbûnê bangek "neaqilane" bû û tu kesekî aqilmend pêşniyarek wisa nake.

"Bê guman Xwedê wê gelê Îranê û rastiyê ber bi serkeftinê ve bibe"

Xameneî tekez kir ku gelê Îranê baweriya xwe bi ayeta "Lawaz nebin, xemgîn nebin; heke hûn bawermend in, hûn çêtirîn in" tîne û got, "Bi taybetî ew kesên ku xizmeta xelkê dikin û bi karê teblîx û agahdarkirinê ve mijûl in, bi biryardarî karê xwe bidomînin. Baweriya xwe bi Xwedê bînin, ji ber ku 'Serkeftin tenê ji Xwedayê Ezîz û Hakîm e ye.’ Bê guman Xwedê ew ê gelê Îranê û rastîyê ber bi serkeftinê ve bibe."  (ÎLKHA)