Ajansa Alîkarî û Kar a Neteweyên Yekbûyî ji bo Penaberên Filistînî li Rojhilata Nêzîk (UNRWA) diyar kir ku ji ber kêmbûna avê, mirovên li Şerîda Xezzeyê di talûkeya mirinê de ne.

Ajansa Alîkarî û Kar a Neteweyên Yekbûyî ji bo Penaberên Filistînî li Rojhilata Nêzîk (UNRWA) bal kişand ser rêjeya ziwabûnê li Xezzeyê û  hişyarî da ku ji ber hilweşîna pergalên dabînkirina avê, xelkê Xezzeyê ji ber tinebûna avê di talûkeya mirina de ne. 

Di daxuyaniyê de hat gotin ku Xezze ji ber ku tenê ji sedî 40ê tesîsên hilberîna avê yên herêmê çalak in li ber ziwabûneke ji ber destê mirovan e.

Hate diyarkirin ku ji ber êrîşên berdewam, sîyaseta koçberiyê ya bi zorê û astengkirina ketina sotemeniyê ji herêmê re ji bo 100 rojan, mîqdara ava ku ji teref UNRWA ve di dema agirbestê de hatiye dayîn, nîvî bûye.

Di daxuyaniyê de bal hat kişandin ser wê rastiyê ku sotemeniya pêwîst ji bo xebitandina bîrên avê qediyaye, hinek bîrên avê li deverên xeternak ên di bin tehdîda êrîşê de ne, hinek boriyên avê di êrîşan de zirar dîtine û tankerên avê nikarin bigihîjin gelek deveran.

Şaredariyên li Xezzeyê di meha borî de hişyarî dan ku dibe ku ji ber kêmbûna sotemeniya ku ji bo xebitandina gelek avahiyan, bi taybetî bîrên avê, hewce ye, di xizmetên xwe de astengiyan bibînin. 

Di daxuyaniyekê de ku di meha Adarê de ji aliyê ofîsa medyayê ya hikûmetê li Xezzeyê ve hat dayîn, hat ragihandin ku rejîma sîyonîst ji 7ê Cotmeha 2023an vir ve 719 bîrên avê wêran kiriye û ji xizmetê derxistiye, ev yek jî bûye sedema krîzeke cîddî ya avê. (ÎLKHA)