Wezareta Parastina Neteweyî di brifînga xwe ya heftane de ragihand ku 376 kes li ser sînoran hatine girtin, 6 endamên PKKê teslîm bûne û 778 kîlogram madeyên hişber hatine desteserkirin.

Civîna çapemeniyê ya heftane ya Wezareta Parastina Neteweyî li Navenda Pîşesaziyên Hewayî û Fezayî ya Tirkiyeyê (TUSAŞ) hat lidarxistin. Di civînê de, ku ji hêla Tumamîral Zeki Akturk ve hat dayîn, daneyên der barê çalakiyên Hêzên Çekdar ên Tirkiyeyê ji bo parastin û ewlehiya welat de hatin parvekirin.

Di daxuyaniyê de hat ragihandin ku di nav hefteyê de şeş endamên PKKê teslîm bûne û şikeft, stargeh û veşartgeh, her wiha mayîn û teqemeniyên destçêkirî li herêmên operasyonê hatine tespîtkirin û îmhakirin.

Di çarçoveya ewlehiya sînor de, hat ragihandin ku 376 kesên ku hewl didan bi awayekî neqanûnî derbas bibin hatine girtin, û 2 hezar û 112 kes ji derbasbûna sînor hatine astengkirin. Hate diyarkirin ku ji 1ê Çile ve hejmara kesên ku hatine girtin gihîştiye 4 hezar û 534 kesan û hejmara kesên ku ji derbasbûna sînor hatine astengkirin jî gihîştiye 38 hezar û 305 kesan.

Di operasyonên lêgerîn û desteserkirinê yên ku li ser xetên sînor ên Wan û Hekariyê di tevahiya hefteyê de hatine kirin de, bi tevahî 778 kîlogram narkotîk hat desteserkirin.

Her wiha di daxuyaniyê de hat destnîşankirin ku di çarçoveya têkoşîna li dijî şewatên daristanan de hevrêziya bi saziyên pêwendîdar re berdewam dike û pêvajoya şandina balafiran ji bo sezona şewatê ya 2026an qediya ye. (ÎLKHA)