حزب الله-ی لوبنان هێرشی رژێمی سەهیۆنی بۆ سەر شاندی حەماس لە دەوحە بە "هەوڵێکی تیرۆری زەلیلانە" وەسف کرد. لە بەیاننامەکەدا داوا لە وڵاتانی عەرەبی و ئیسلامی و هەروەها کۆمەڵگەی نێودەوڵەتی کراوە کۆتایی بە هەموو پشتیوانییەک لەم دەسەڵاتە بهێنن.

حزب الله-ی لوبنان هێرشی رژێمی سەهیۆنی بۆ سەر شاندێکی باڵای حەماس لە دەوحە بە توندی ئیدانە کرد.

لە بەیاننامەکەدا جەخت لەوە کراوەتەوە کە ئەم هێرشە نەک هەر سەروەری قەتەر پێشێل دەکات بەڵکو یاسا و ڕێککەوتنە نێودەوڵەتییەکان لە پێ دەشکێنێت.

حزب الله ڕایگەیاند کە هێرشەکە بە پاڵپشتی ئەمریکا ئەنجام دراوە و هاتووە، "ئەم رژێمە نە ئاشتی دەوێت و نە دانوستان. تاکە ئامانجی جێبەجێکردنی پڕۆژەکانی لەسەر بنەمای خوێن و مردن و وێرانکارییە. تەنانەت ئەگەر باجەکەی ژیانی ئەسیرانی خۆی بێت."

لە ڕاگەیەندراوەکەدا بانگەوازێکی بەپەلە ئاراستەی وڵاتانی عەرەبی و ئیسلامی و دامەزراوە نێودەوڵەتییەکان کراوە و تیایدا هاتووە، "بەیاننامەی شەرمەزارکردن و سکاڵا چیتر بەسە. دەبێت هەنگاوی کۆنکرێتی بنرێت بۆ ڕاگرتنی کۆمەڵکوژییەکان و لێپرسینەوە لەم دەسەڵاتە."

حزب الله هەروەها خوازیاری پچڕانی هەموو پەیوەندییەکانی لەگەڵ رژێمی سەهیۆنی و سەپاندنی گوشاری توند بەسەر ئەمریکا بۆ پشتیوانی بێ سنووری ئەمریکا بوو.

لە کۆتایی ڕاگەیەندراوەکەدا هاتووە، "ئێستا دەمامکی ئەم پێکهاتە گەندەڵە دڕاوە. رژێمی سەهیۆنی لە پێش چاوی جیهان خەریکی ڕاگەیاندن و جێبەجێکردنی پڕۆژە داگیرکاری و کۆلۆنیالیزمەکانە. ئەگەر دژی ئەم پێکهاتەیە ڕێوشوێن نەگیرێتەبەر، ڕووبەڕووی سەپاندنێک دەبینەوە کە هەرێم و گەلەکەی بەرەو کارەسات دەکێشێت."(İLKHA)