سەرچاوەیەکی ئەمنی لە بەرخۆدانی فەلەستین بە کەناڵی جەزیرەی ڕاگەیاندووە، لە چەند ڕۆژی ڕابردوودا چەتەکانی سیخوڕ و موستەعریب (یەکە نهێنییەکانی رژێمی سەهیۆنی کە خۆیان لە عەرەب پۆشیوە) هەندێک موجاهیدیان لە کەرتی غەززە ڕفاندووە.

ئەو سەرچاوەیە ئەوەشی خستەڕوو کە ئەو چەتانە ڕۆڵێکی هەرزانیان بۆ داگیرکاری وەرگرتووە و زانیارییان لەسەر شوێنی زیندانییەکان و تونێلەکانی بەرخۆدان کۆکردووەتەوە.

هەروەها جەختی لەوە کردەوە کە گروپە خۆڕاگرەکان بە دوای ئەو سیخوڕ و تاوانبارانەدا دەکەون و هیچ بەهیچ ڕەحمێکیان پێ ناکەن و ئەو سزایەش دەسەپێنن کە شایستەیانە.

مانگی تەمموزی ساڵی ڕابردوو، سەرچاوەیەکی باڵای ئەمنی لە بەرخۆدانی فەلەستین بە کەناڵی جەزیرەی ڕاگەیاندبوو کە ئەوان "لیستی ڕەشی شەڕفرۆشان، باندە ڕێکخراوەکان و سیخوڕەکانی داگیرکەران"یان لە غەززە هەیە، کە دادگایی دەکرێن و دواتر سزا دەدرێن.

سەرەتای ئەو مانگە بەرپرسێکی ئەمنیی بزووتنەوەی حەماس ڕایگەیاندبوو کە خاڵە فریاگوزارییەکان لە غەززە وەک شوێنی کۆبوونەوەی زانیاریدەرەکان بۆ داگیرکاری بەکاردەهێنرێن و مادەی هۆشبەر بۆ ڕاکێشانی گەنجان و بەستنەوەیان بۆ ئاسایش و ئەرکی سیخوڕییان پێدەسپێردرێت.

بە پشتیوانی رژێمی داگیرکەر، گرووپگەلێک لەوان باندی یاسر ئەبو شەباب کە لە رەفەح چالاکی دەکەن، سەریان هەڵدا. لە ئێستادا رەفەح لەژێر کۆنترۆڵی داگیرکەراندایە.

میدیاکانی داگیرکەران ڕایانگەیاندووە کە گرووپەکانی دیکەی هاوکاری لەگەڵ رژێمی سەهیۆنیش لە باکووری غەززە چالاکی دەکەن.

چەند مانگێک لەمەوبەر ڕۆژنامەی یەدیوت ئەحرۆنۆت بڵاویکردەوە، جگە لە گروپی یاسر ئەبو شەباب، گروپە چەکدارەکانی دیکە لە باشوور و باکووری غەززە دژی حەماس چالاکی دەکەن و دەزگای ئاسایشی ناوخۆی داگیرکەر، شەبەک، بە نهێنی "میلیشیایەکی غەززە" بە ڕەزامەندی ڕاستەوخۆی نەتانیاهۆ چەکدار دەکات.(İLKHA)