ڤلادیمێر پوتین، سەرۆکی رووسیا ڕایگەیاند، سوپای رووسیا بەتەواوی دەستی بەسەر کۆنستنتینیۆڤکادا گرتووە، کە بە یەکێک لە گرنگترین ناوەندەکانی بەرگری لە ناوچەی دۆنێتسک دادەنرێت.

بە وتەی کرێملین، ئەم پێشهاتە بە یەکێک لە گرنگترین خاڵە وەرچەرخانەکانی شەڕی گەیشتن بە کۆنترۆڵی تەواوەتی دۆنباس دادەنرێت.

ڤالێری جیراسیمۆڤ، سەرۆکی ئەرکانی گشتیی رووسیا لە ڕاپۆرتێکدا بۆ پوتین ڕایگەیاند کە کۆنستنتینیۆڤکا لە ئەنجامی ئۆپەراسیۆنە هێرشبەرە سەرکەوتووەکانی گرووپی هێزەکانی باشوور ڕزگار کراوە. جیراسیمۆڤ ڕایگەیاند کە شارەکە یەکێکە لە خاڵە گرنگەکانی هێڵی بەرگری سلۆڤیانسک-کراماتۆرسک-کۆنستانتینۆڤکا، هەروەها سەربازانی رووسیا بەردەوامن لە پێشڕەوی خۆیان بەرەو ئامانجەکەیان کە کۆنترۆڵکردنی تەواوی ناوچەی دۆنێتسک بوو.

پوتین ڕایگەیاند کە کۆنستنتینیۆڤکا گرنگییەکی ستراتیژی گەورەی هەیە نەک تەنها لە ڕووی سەربازییەوە، بەڵکو لەبەر ئەوەی یەکێکە لە ناوەندە سەرەکییەکانی گواستنەوە و پیشەسازی دۆنباس. ئەو وێنانەی وەزارەتی بەرگری رووسیا بڵاویکردۆتەوە، دەرکەوتووە کە سەربازانی رووسیا ئاڵای رووسیایان لە بەردەم باڵەخانە وێرانبووەکاندا بەرزکردۆتەوە.

هەروەها جیراسیمۆڤ، سەرۆکی ئەرکانی گشتی سوپای رووسیا ڕایگەیاند کە سەربازانی رووسیا بەردەوامن لە پێشڕەوی خۆیان بەرەو شاری لایمان، کە شارێکە لە باکوور بە ناوەندێکی لۆجستیکی گرنگ دادەنرێت بۆ ئۆپەراسیۆنە نوێیەکان.

لە لایەکی دیکەوە پوتین ڕایگەیاند کە هێرشە دوورمەوداکانی ئۆکرانیا بۆ سەر ژێرخانی وزەی رووسیا زیادی کردووە و لە بەرامبەردا ناوچەی ئەمنی فراوانتر بەدرێژایی سنوورەکان دروست دەکرێت. پوتین وتی، "تا دوژمن زیاتر هەوڵی هێرشکردنە سەر دامەزراوە مەدەنییەکانمان بدات، ناوچەی ئەمنی فراوانتر دەبێت لە ناوچەکانی دراوسێدا."

یێڤگنی نیکیفۆرۆڤ، فەرماندەی هێزەکانی باکووری رووسیا، هەروەها ڕایگەیاندووە کە کار بۆ دروستکردنی ناوچەی پارێزراو لە ناوچەی خارکیڤ و سومی بەردەوامە و سەربازانی رووسیا بە درێژایی سنوورەکان بەردەوامن لە پێشڕەوی.

کرێملین لێدوانەکانی ڤۆلۆدیمیر زێلێنسکی سەرۆکی ئۆکرانیای سەبارەت بە خاوبوونەوەی پێشڕەوی سەربازیی رووسیای بە شەڕی زانیاری و پڕوپاگەندە وەسف کرد. پوتین ئاماژەی بەوەدا کە حکومەتی کیێڤ هەوڵدەدات وێنەیەکی سەرکەوتن بۆ خەڵک پرۆژە بکات.

تا ئێستا حکومەتی ئۆکرانیا بە فەرمی ئەو بانگەشەیە پشتڕاست نەکردووەتەوە یان ڕەتی نەکردووەتەوە کە رووسیا بە تەواوی کۆنترۆڵی کۆنستنتینیۆڤکای کردووە.

دەستپێشخەرییەکانی ئاشتی بە نێوەندگیری ئەمریکا کە بەهۆی پێشهاتەکانی ئێرانەوە ڕاگیراون، چاوەڕوان دەکرێت لە ماوەی داهاتوودا زیندوو بکرێنەوە. مۆسکۆ و کیێڤ ڕایانگەیاندووە کە پێشبینی دەکەن دانوستانکارانی ئەمریکا جارێکی دیکە سەردانی ناوچەکە بکەنەوە.(İLKHA)