Hamasê ji bo protestokirina êrîş û dorpêça Xezzeyê ya ji aliyê rejîma işxalker ve, bang li tevahiya cîhanê kir ku di 13, 14 û 15ê Mijdarê de li çaraliyê cîhanê xwepêşandan, meş û çalakiyên hevgirtinê werin lidarxistin.

Di daxuyaniyekê de ku ji aliyê Hamasê ve hat weşandin, ji alîgirên Filistînî yên li cîhana Ereb û Îslamî, û her weha li gelek welatên din ên cîhanê hat xwestin ku di rojên pêş de li qadên giştî xwepêşandanên girseyî, meş û rûniştinê li dar bixin.

Tevgerê bi taybetî daxwaz kir ku roja Înê 13ê Mijdarê, Şemiyê 14ê Mijdarê û Yekşemiyê 15ê Mijdarê ji bo çalakiyên hevgirtinê bi Xezzeyê re werin veqetandin. Hamasê daxwaz kir ku çalakî ne tenê di van rojan de, lê di rojên piştre de jî berdewam bikin.

Hamasê bang li tevgerên siyasî, sendîkayên karkeran, rêxistinên mafên mirovan û gel û komên civakî yên li welatên cuda kir ku li meydan û paytextan xwepêşandanên girseyî li dar bixin.

Di daxuyaniyê de hat destnîşankirin ku ji ber şert û mercên zivistanê, Filistîniyên koçber ên di stargeh û konan de bi pirsgirêkên cîddî yên parastina ji baranê re rû bi rû ne, û nebûna pêdiviyên bingehîn ên stargeh û germkirinê krîza mirovî hîn kûrtir dike. (ÎLKHA)