وته‌بێژی وه‌زاره‌تی کشتوکاڵ ئاماژه‌ی بۆ ئه‌وه‌ کرد، له‌ هه‌ندێ ناوچه‌ی هه‌رێمی کوردستان وشکه‌ساڵییە و وتی، "پلانمان ناردووه‌ بۆ سه‌رۆکایه‌تی ئه‌نجوومه‌نی وەزیران به‌ مه‌به‌ستی بەرەنگاربوونه‌وەی وشکه‌ساڵی و گۆڕانکارییه‌کانی که‌شوهه‌وا."

هیوا عه‌لی، وته‌بێژی وه‌زاره‌تی کشتوکاڵ و سه‌رچاوه‌کانی ئاو راگه‌یاند، "وشکەساڵی به‌پێی تایبه‌تمه‌ندی شوێنه‌کانه‌، که‌می باران و دابه‌زینی ئاستی ئاو کاریگه‌ریی کردووەته‌ سه‌ر که‌رتی کشتوکاڵ، ڕاسته‌ ئەمساڵ له‌ هه‌رێمی کوردستان بارانی پێویست نه‌باریوە، به‌ڵام ده‌کرێت بڵێین نیمچه‌ وشکه‌ساڵییه‌، له‌به‌ر ئه‌وه‌ی هه‌ر ناوچه‌یه‌ک تایبه‌تمه‌ندی خۆی هه‌یه‌، بۆ نموونه‌ له‌وانه‌یه‌ له‌ هه‌ولێر وشکه‌ساڵی بێت، له‌ دهۆک ڕه‌وشه‌که‌ جیا بێت، له‌ سلێمانی، هه‌ڵه‌بجه‌ و گه‌رمیان جۆرێکی دیکە، هه‌ر شاره‌ و تایبه‌تمه‌ندی خۆی هه‌یه‌، ئاستی دابه‌زینی ئاو و به‌رهه‌می کشتوکاڵ له‌ هه‌موو شوێنێک وه‌ک یه‌ک نییه‌."

وتەبێژەکە هەروەها وتی، "ناتوانیت بڵێین وشکه‌ساڵی سه‌رتاسه‌رییه‌، به‌و پێیه‌ی کاریگه‌ری که‌می باران زۆرتره‌ له‌سه‌ر هه‌ندێ ناوچه‌، له‌و ناوچانه‌ وشکه‌ ساڵییه‌، به‌تایبه‌تی ڕێژه‌ی وشکه‌ساڵی زیاتر له‌ هه‌ردوو پارێزگای هه‌ولێر و دهۆکه‌."

هیوا عەلی لە بەردەوامی وتی، "به‌ به‌رده‌وامی پلانی به‌رەنگاربوونه‌وه‌ی وشکه‌ساڵی و گۆڕانکارییه‌کانی که‌شوهه‌وا هه‌یه‌، وه‌زاره‌تی کشتوکاڵ پلانی خۆی پێشکه‌شی سه‌رۆکایه‌تی ئه‌نجوومه‌نی وه‌زیران کردووه‌، یه‌کێک له‌وانه‌ش پاڵپشتی داراییە بۆ وه‌زاره‌تی کشتوکاڵ، هه‌روه‌ها زیادکردنی توانای گلدانه‌وه‌ی ئاوە له‌ هه‌رێمی کوردستان، له‌ ڕێگه‌ی زیادکردنی ژماره‌ی به‌نداو و پۆنده‌کان، خاڵێکی دیکه‌ی پلانه‌که‌ گواستنه‌وه‌ی ئاوه‌ له‌ که‌ناڵه‌کانی ئاودێری بۆ جووتیاران، ئەوە جگە لە دابینکردنی بنه‌تۆ بۆ جووتیاران و ئاشناکردنی جووتیاران به‌ گۆڕانکاریه‌کانی که‌شوهه‌وا و چه‌ندین خاڵی دیکه‌ش."(İLKHA)