حکومەتی غەززە راگەیاند، لەگەڵ ئەوەی رژێمی داگیرکەر رێککەوتنی ئاگربەستی لەگەڵ حەماس واژۆ کردووە بەڵام رێگری لە چوونەوەی هاوکارییەکان بۆ ناو کەناری غەززە دەکات و دەرەنگی دەخات.

ئۆفیسی میدیایی حکومەتی غەززە لە راگەیەندراوێک باسی لەوە کرد، رژێمی داگیرکەر پەیڕەوی لە مەرجەکانی ئاگربەست کە بەخۆی واژۆی کردووە ناکات و هاوکاری مرۆیی دوادەخات.

لە راگەیەندراوەکە باس لەوە کرا، رژێمی داگیرکەر رێگری لە گواستنەوەی هاوکاری مرۆیی وەک شوێنی حەوانەوە، خۆراک و هاوکارییەکانی دیکە بۆ ناو غەززە دەکات.

لە راگەیەندراوەکە ئاماژەی بەوە کرا، بە پێی رێککەوتنی ئاگربەست دەبێت ٦٠ هەزار کاراوان، ٢٠٠ هەزار خێمە بچێتە ناو غەززە و لە ماوەی ٧ ڕۆژدا ڕۆژانە ٦٠٠ بارهەڵگری هاوکاری بچێتە کەناری غەززە کە ٥٠یان سووتەمەنی بن بەڵام رژێمی داگیرکەر رێگری لە گواستنەوەی هاوکارییەکان دەکات و ئەو رەوشەش دەبێتە هۆی قوڵتربوونی قەیرانی مرۆیی لە غەززە.

داوا لە وڵاتانی زامنی ئاگربەست و گروپە نێودەوڵەتییەکان کرا کە بە شێوەیەکی کاریگەر بەرپرسیارێتی خۆیان لە ئەستۆ بگرن و فشار بخەنە سەر رژێمی داگیرکەر بۆ دڵنیابوون لە جێبەجێکردنی بێ بەربەستی بڕگەکانی پرۆتۆکۆڵی مرۆیی لە ژێر ئاگربەستەکەدا.

رێککەوتنی ئاگربەست و ئاڵوگۆڕی ئەسیران لە نێوان حەماس و رژێمی سەهیۆنی لە ڕۆژی یەکشەممە ١٩ی کانوونی دووەم کەوتە بواری جێبەجێکردنەوە.(İLKHA)