ئەمڕۆ یەکشەممە ٢١ی ئایار جارێکی دیکە شاری مەسقەتی پایتەختی عومان میوانداری خولی چوارەمی دانوستانەکانی ناڕاستەوخۆی ئێران و ئەمریکا دەکات.

سەید عەباس عێراقچی وەزیری دەرەوەی ئێران و شاندی یاوەری بۆ بەشداریکردن لە چوارەمین خولی دانوستانەکانی ناڕاستەوخۆ لەگەڵ ئەمریکا گەیشتنە شاری مەسقەت، کە لەلایەن بەرپرسانی وەزارەتی دەرەوەی عومانەوە پێشوازییان لێکرا.

سەید عەباس عێراقچی، وەزیری دەرەوەی ئێران، پێش سەفەری بۆ مەسقەت، بە ئاماژەدان بە پلانەکانی خولی چوارەمی دانوستانەکان، رایگەیاند، "دوێنێ سەفەری دوو وڵاتی ناوچەکەم کرد، قەتەر و عەرەبستان، ئەمڕۆش بەرەو مەسقەت بەڕێدەکەوین بۆ بەشداریکردن لە خولی داهاتووی دانوستانەکان."

ناوبراو لە درێژەی قسەکانیدا وتی، "بەرەبەیانی ئەمڕۆ لە تاران ڕاوێژی زیاترمان هەبوو و هیوادارین لە دانوستانەکانی ئەمڕۆدا بگەینە خاڵێکی چارەنووسساز."

عێراقچی ڕەخنەی لە لێدوانە دژبەیەکەکانی بەرپرسانی ئەمریکا سەبارەت بەم دانوستانانە و داواکارییەکانیان لەم پرۆسەیەدا گرت و وتی، "بەداخەوە لێدوانی دژبەیەک لەوان دەبیستین، لێدوانی لایەنی بەرامبەریش لەسەر مێزی دانوستان و دەرەوەی دانوستان جیاوازە و ئەمەش یەکێکە لە کێشەکانی ئێمە لەو دانوستانانەدا."

وەزیری دەرەوەی ئێران وتی، "بەپێچەوانەوە، ئێران هەڵوێستی ڕوونی هەیە، ئێمە بە هێڵێکی ڕاست هەنگاومان ناوە. پیتاندن یەکێک لە دەستکەوت و شەرەفەکانی نەتەوەی ئێرانە، کە باجێکی قورسی بۆ دراوە و خوێنی زانایانی ئەتۆمی ئێمە ڕژاوە و بە دڵنیاییەوە جێگای دانوستان نییە."(İLKHA)