تۆم فلێچەر، یاریدەدەری سکرتێری گشتی نەتەوە یەکگرتووەکان بۆ کاروباری مرۆیی رایگەیاند، نیوەی دوو ملیۆن و ٣٠٠ هەزار منداڵی یەمەن بەدەست بەدخۆراکییەوە دەناڵێنن.

فلێچەر لە بەیاننامەکەیدا ئاماژەی بەوە کردووە کە ٦٠٠ هەزار لەو منداڵە یەمەنییانەی کە بەدەست بەدخۆراکییەوە دەناڵێنن، لە دۆخێکی سەختی بەدخۆراکیدان.

فلێچەر ئاماژەی بەوە کرد کە لە یەمەن منداڵان بەهۆی خراپتربوونی دۆخی مرۆیی وڵاتەکەیان مەترسی زیاتریان لەسەرە و تەنها لەسەدا ٦٩ی منداڵانی خوار تەمەنی یەک ساڵ کوتانی تەواویان بۆ کراوە، لەکاتێکدا لەسەدا ٢٠یان هیچ کوتانێکیان وەرنەگرتووە. فلێچەر جەختی لەوە کردەوە کە ئەم ڕێژانە لە خراپترین ڕێژەکانی جیهانن.

فلێچەر وتی، لەژێر ئەم هەلومەرجانەدا، ئەو نەخۆشیانەی کە بە ڤاکسین ڕێگرییان لێدەکرێت، قەیرانی مرۆیی زیاتر قووڵتر دەکەنەوە، ئاماژەی بەوەشکرد، حاڵەتەکانی کۆلێرا و سورێژە لە زیادبووندایە.

فلێچەر ئاماژەی بەوەشکرد، ساڵی رابردوو یەمەن زیاتر لە یەک لەسەر سێی تووشبووانی کۆلێرا لە جیهاندا تۆمارکردووە و لەسەدا ١٨ی مردن بەهۆی کۆلێراوە تۆمار کراوە، هەروەها یەکێکە لە بەرزترین ڕێژەی تووشبوون بە نەخۆشی سورێژە لە جیهاندا.

فلێچەر وتی، "بەدخۆراکی کاریگەری لەسەر یەک ملیۆن و ٤٠٠ هەزار ئافرەتی دووگیان و شیردەر هەبووە و دۆخەکە دایکان و کۆرپە تازە لەدایکبووەکان دەخاتە مەترسییەکی زۆرەوە.

فلێچەر هەروەها هۆشداری دا لەوەی کات و سەرچاوەکان تەواو دەبن و ئاماژەی بەوەدا کە پلانی کاردانەوەی مرۆیی ساڵی ٢٠٢٥ بۆ یەمەن تەنیا لەسەدا ٩ی بودجەی پێویستی وەرگرتووە.(İLKHA)