فڕۆکە جەنگییەکانی هێزی ئاسمانی ئەمریکا هێرشێکی ئاسمانییان کردە سەر بەلەمێکی ماسیگرتنی ڤەنزوێلا لە کەناراوەکانی کاریبی. لەو هێرشەدا ٣ هاوڵاتیی ڤەنزوێلا کوژران.

دۆنالد ترەمپ، سەرۆکی ویلایەتە یەکگرتووەکانی ئەمریکا ڕایگەیاند، سوپای ئەمریکا بەلەمێکی دیکەی هەڵگری ماددە هۆشبەرەکانی داوە کە لە ڤەنزوێلاوە ڕۆیشتووە و بانگەشەی ئەوەی کرد کە لە هێرشەکەدا ٣ ئەندامی کارتێلەکە کوژراون.

ترامپ ڕایگەیاند کە فەرمانی هێرشەکەی داوە و دووەم هێرشە دژی کارتێلەکانی ماددە هۆشبەرەکان.

ترامپ بە ئاماژەدان بەوەی کە بەلەمەکە لە ڤەنزوێلاوە بەڕێکەوتووە و لەلایەن قاچاخچییەکانی ماددە هۆشبەرەکانەوە بەکارهێنراوە، ڕایگەیاندووە کە هێرشەکە لە ئاوە نێودەوڵەتییەکان ئەنجام دراوە.

ترامپ ئاماژەی بەوەدا کە ٣ ئەندامی کارتێلەکە لە هێرشەکەدا کوژراون، وتی "ئەم کارتێلە زۆر مەترسیدارانەی بازرگانیکردن بە ماددە هۆشبەرەکان مەترسی لەسەر ئاسایشی نیشتمانی و سیاسەتی دەرەوە و بەرژەوەندییە گرنگەکانی ئەمریکا دروست دەکەن."

ترامپ وتی "هیچ سەربازێکی ئەمریکی لەم هێرشەدا زیانی پێنەگەیشت، ئێمە ئاگادارتان دەکەینەوە: ئەگەر مادەی هۆشبەرتان پێبێت کە ئەمریکییەکان بکوژن، ئێمە ڕاوتان دەکەین. چالاکییە نایاساییەکانی ئەم کارتێلانە بۆ دەیان ساڵە دەرئەنجامە وێرانکەرەکانی لەسەر کۆمەڵگاکانی ئەمریکا هەبووە و بووەتە هۆی گیانلەدەستدانی ملیۆنان هاوڵاتی ئەمریکی. ئەوە دووبارە نابێتەوە."(İLKHA)