خەلیل ئەلحەیە، سەرۆکی بزووتنەوەی حەماس لە غەززە ڕایگەیاند، شەڕی غەززە کۆتایی هاتووە و بزووتنەوە و گروپە فەلەستینییەکان لە سەرەتاوە تا کۆتایی پابەند دەبن بە ڕێککەوتنی وەستاندنی شەڕ و پێکدادانەکان.

خەلیل ئەلحەیە، سەرۆکی بزووتنەوەی حەماس لە غەززە و سەرۆکی تیمی دانوستانکار، ڕایگەیاند، گروپە فەلەستینییەکان بە تەواوی پابەندن بە ڕێککەوتنی کۆتاییهێنان بە شەڕەکانی غەززە. ئەلحەیە جەختی لەوە کردەوە کە ڕێککەوتنەکە بە ئیرادەی نێودەوڵەتی و ئەو دانوستانانەی لە میسر ئەنجام دراون پاڵپشتی کراوە.

لە چاوپێکەوتنێکدا لەگەڵ قاهیرە نیوز، حەیە سڵاوی ئاراستەی خەڵکی غەززە کرد، بەتایبەتی ئەوانەی سەبریان نیشان داوە و بە درێژایی شەڕ بەرگەی هێرشەکان گرتووە و وتی، "ئەم ڕێککەوتنە هەموو سوودەکانی کۆتایی هێنان بە شەڕ و دڵنیابوون لەوەی گەلەکەمان وەک گەلانی دیکەی جیهان لە ئاسایشدا بژین تێدا هەیە" و ئاماژەی بەوەشکردووە، "بەبڕیارانە ئەم ڕێککەوتنە تا کۆتایی جێبەجێ دەکەین."

ئەلحەیە ستایشی هەوڵەکانی نێوەندگیری میسر و قەتەر و تورکیای کرد و هەروەها ڕایگەیاندووە کە هەنگاوی جددییان ناوە بۆ گەڕاندنەوەی پاشماوەی هەموو ونبووەکان بۆ خێزانەکانیان. ئاماژەی بەوەشکرد، پرۆسەکە قورسە و کاتێکی زۆری دەوێت بەهۆی ئەوەی هەندێک تەرم لە ژێر داروپەردوو و زەوییەکەدا نێژراون. بەڵام جەختی لەوە کردەوە کە پرۆسەکە تا تەواوبوونی بەردەوام دەبێت.

حەیە داوای لە ناوبژیوانان کرد کە هەوڵەکانیان زیاتر بکەن بۆ زیادکردنی بڕی هاوکارییە مرۆییەکان بۆ غەززە و دابینکردنی پێداویستییەکان، بەتایبەتی لەڕووی پەناگە و پێداویستییە پزیشکییەکان پێش زستان.(İLKHA)