بزووتنەوەی خۆڕاگری ئیسلامیی فەلەستین حەماس بە دەرکردنی بەیاننامەیەک، چالاکییە قارەمانانەکەی شێلان بە ئۆتۆمبێل و هێرش بە چەکی سارد لە نزیک کۆمەڵگەی نیشتەجێبوونی گووش عتسیۆن لە باشووری بەیت لەحم بەرز نرخاند و ڕاگەیاند، "وەڵامێکی سروشتییە بۆ تاوانەکانی داگیرکەران."

بزووتنەوەی خۆڕاگری ئیسلامیی فەلەستین حەماس بە دەرکردنی بەیاننامەیەک، چالاکییە قارەمانانەکەی شێلان بە ئۆتۆمبێل و هێرش بە چەکی سارد لە نزیک کۆمەڵگەی نیشتەجێبوونی گووش عتسیۆن لە باشووری بەیت لەحم بەرز نرخاند و بە وەڵامێکی سروشتیی زانی بۆ هەوڵەکانی رژێمی داگیرکەر بۆ لەناوبردنی دۆزی فەلەستین و هەروەها زیادبوونی سەرکوت و دەستدرێژیی سەربازانی داگیرکەر و نیشتەجێبووەکان لە کەناری ڕۆژئاوا و قودس، کە کوشتن، دەستبەسەرکردن، وێرانکاری، دروستکردنی کۆمەڵگەی نیشتەجێبوون و هەڵکوتانە بەردەوامەکان دەگرێتەوە.

حەماس لەم بەیاننامەیەدا جەختی کردەوە کە بەردەوامیی دەستدرێژییە تاوانکارییەکان دژی گەلی فەلەستین، هەوڵەکان بۆ سەپاندنی ئەمری واقیعی نوێ لە کەرتی غەززە و بەردەوامیی پیلانەکانی بەجووەکردن و لکاندن لە کەناری ڕۆژئاوا، بەبێ ڕووبەڕووبوونەوە و کاردانەوەی مەیدانی تێناپەڕێت.

حەماس ڕاگەیاند، "گەلەکەمان مافی بەرگریی هەیە لە بەرامبەر داگیرکاری و وەڵامدانەوەی تاوان و پێشێلکارییەکانی، و ئەم چالاکییەش هیچ نییە جگە لە ئەنجامێکی حەتمیی پێداگریی رژێمی داگیرکەر لەسەر دەستدرێژییەکانی دژی گەل و خاک و پیرۆزییەکانمان."

حەماس جارێکی دیکە جەختی کردەوە کە گەلی فەلەستین لەسەر خۆڕاگری و سووربوونی لەسەر مافە ڕەواکانی بەردەوام دەبێت و سەرجەم هەوڵەکان بۆ لەناوبردنی دۆزەکە و پیلانەکانی کۆچپێکردن شکست پێ دەهێنێت.

ئەم بزووتنەوەیە هەروەها هۆشداریی دا لە مەترسیداربوونی دۆخی مەیدانی لە ئەگەری بەردەوامیی سەرکوت و ستەمکاریی رژێمی داگیرکەر و جارێکی دیکە داوای لە کۆمەڵگەی نێودەوڵەتی کرد کە بۆ ڕاگرتنی تاوانە بەردەوامەکانی داگیرکەران، هەنگاو بنێن و گوشار دروست بکەن.

حەماس لە کۆتایی بەیاننامەکەیدا ڕاگەیاند، "دەبێت جیهان پشتیوانی لە قوربانی بکات، لەجیاتی ئەوەی هاوکاری جەللاد بێت."(İLKHA)