پەکەکە راگەیاند، هەفتەی رابردوو کۆنگرەیان رێکخستووە و بڕیاری خۆهەڵوەشاندن و دانانی چەکیان داوە.

پەکەکە راگەیاند، لە ٥-٧ی ئایار ١٢مین کۆنگرەکەیان رێکخستووە و بڕیاریان داوە کە رێکخراوەکە هەڵبوەشێنن و کۆتایی بە چالاکییەکانی چەکدارانە بهێنن. لە راگەیەندراوەکە باس لەوە کرا کە کۆتاییان بە چالاکییەکان لە ژێر ناوی پەکەکە هێناون.

لە راگەیەندراوەکە باس لەوە کرا، کۆنگرەکە بە بەشداری ٢٣٢ ئەندام بەڕێوەچووە و دواتر هاتووە، "کۆنگرەی دوازدەهەمی پەکەکە بڕیاری دا کۆتایی بە بوونی رێکخراوەیی پەکەکە بهێنێت و واز لە میتۆدی خەباتی چەکداری بهێنێت، لە چوارچێوەی ئەو پڕۆسە پراکتیکییەی کە ئاپۆ بەڕێوەی دەبات و ئەو کارانەی بەم ناوەوە ئەنجام دەدرێن ڕاگرت."

لە بەردەوامی راگەیەندراوەکە وەک هۆکاری هەڵوەشاندنی باس لەوە کرا، "دیالێکتیکی مێژوویی هەزار ساڵەی پەیوەندییەکانی کورد و تورک نیشانی داوە کە پرسی کورد تەنیا بە چارەسەرکردنی لەسەر بنەمای نیشتمانێکی هاوبەش و هاوڵاتییەکی یەکسان بەدی دێت. هەروەها پێشهاتەکانی ئێستای ڕۆژهەڵاتی ناوەڕاست لە چوارچێوەی جەنگی جیهانی سێیەمدا، ڕێکخستنەوەی پەیوەندییەکانی کورد-تورک چارەنووسساز دەکەن."(İLKHA)