لە دیاربەکر ڕاگەیەندراوێکی میدیایی بۆ پشتیوانی لە بەرخۆدانی غەززە و ئیدانەی کردنی کۆمەڵکوژییەکانی رژێمی داگیرکەر بەڕێوەچوو.

وەقفی ئەڤیندارێن پێغەمبەر کە لە ٧ی ئۆکتۆبەری ٢٠٢٣یەوە بەردەوامە لە ڕێکخستنی بەرنامەکانی پشتیوانی لە بەرخۆدانی غەززە و ئیدانەکردنی رژێمی داگیرکەر دوێنێ لە دیاربەکر بەرنامەیەکی ڕێکخست.

بەرنامەکە بە تەوەری "ئەم بێدەنگییە بشکێنە، وەرە مەیدان" بەڕێوەچوو.

ژمارەیەکی زۆر هاوڵاتی بەشداریان لە بەرنامەکە کرد و ئیدانەی رژێمی داگیرکەری سەهیۆنییان کرد کە زیاتر لە ٢٢٠ هەزار فەلەستینیی شەهید و بریندار کردووە.

پێش لە ڕاگەیەندراوی میدیایی یەحیا ئۆغراش یاریدەدەری سەرۆکی گشتی هودا پار وتارێکی پێشکەش کرد.

"تۆفانی ئەقسا تەواوی دەمامەکانی هەڵدا"

یەحیا ئۆغراش وتی، "پاڵەوانی بەرخۆدان ئەبو عوبەیدە وتی 'بڕۆنە سەر شەقامەکان، بڕۆن بۆ گۆڕەپانەکان و هاوارمان بۆ بکەن' ئێمەش دەچینە گۆڕەپانەکان. هەرکەسێک هەرچییەک بڵێت، ئێمە بەردەوام دەبین لە قسەکردن دژی ئەم ستەمکارییە. ئاماژەیەک لە ئەبو عوبەیدە بۆ ئێمە بەسە. قارەمانەکانی غەززە دەمامکی جیهانیان هەڵدا. ڕەنگی ڕاستەقینەی هەموو وڵاتان و سەرکردەکان ئاشکرا بووە. ئەوانەی ڕاستگۆن، ئەوانەی بەڕاستی هەوڵ دەدەن شتێک بۆ خودا بکەن، هەموویان ئاشکرا بوون."

دوای وتارەکەی ئۆغراش، ئیسماعیل دالقلچ لە سەرناوی وەقفی ئەڤیندارێن پێغەمبەر ڕاگەیەندراوی میدیایی خوێندەوە.

"ئەو زوڵمەی ئەمڕۆ لە دوورەوە شاهیدی دەبین، ڕۆژێک دەگاتە بەر دەرگامان"

ناوبراو ئاماژەی بەوە کرد کە پرسی غەززە پرسی تەواوی مرۆڤایەتییە و هۆشداری دایەوە کە ئەگەر دەستبەکار نەبین خەتەرەکە گەورەتر دەبێت.

دالقلچ وتی، "کۆمەڵگەی نێودەوڵەتی و دەوڵەتەکان دەبێت دەستبەجێ دەستوەردان بکەن لەم کارەساتەدا کە لە غەززە ڕوودەدات. ئەو زوڵمەی ئەمڕۆ لە دوورەوە شاهیدی دەبین، ڕۆژێک دەگاتە بەر دەرگامان. پلانەکان لە ئارادایە بۆ گۆڕینی ناوچەکەمان بۆ دۆزەخێکی فراوان. پڕۆژەی بەناو 'ئیسرائیلی گەورە'ی نەتانیاهۆ، ڕاگەیاندنێکی ڕوونە کە هیچ وڵاتێکی ناوچەکە سەلامەت نییە. لە بەرامبەر ئەم هەڕەشە ڕوونە، پێویستە وڵاتانی ئیسلامی ڕێوشوێنی جددی بگرنەبەر و کۆتایی بە کۆمەڵکوژی غەززە بهێنن. پێویستە هێزێکی دەستێوەردانی ناوچەیی دابمەزرێت و هەنگاوی کۆنکرێتی دژ بە چەوساندنەوەی سەهیۆنییەکان بنرێت. وڵاتانی خاوەن ویژدان بەتایبەتی تورکیا دەبێت ئەم هێزە پێکبهێنن."

"دەبێت گوشار بخرێتە سەر هاوپەیمانی خراپەکاری سەهیۆنی"

ئیسماعیل دالقلچ لە کۆتاییدا ئەم داوانەی پێشکەشی گەلانی ئازادی جیهان و ڕابەرانی خاوەن ویژدانی دەوڵەتەکان کرد و وتی:

-پێویستە دەستبەجێ دەروازە سنوورییەکان لە غەززە بەبێ هیچ مەرجێکی پێشوەختە بکرێنەوە.

-پێویستە گەمارۆیەک بەسەر رژێمی داگیرکەردا بسەپێندرێت، هەروەها بەکارهێنانی چەک لە پێشێلکردنی یاسا مرۆییە نێودەوڵەتییەکان ڕێگەپێنەدرێت.

-دەبێت بۆ خۆڕاگری لە دژی رژێمی داگیرکەر پشتیوانی چەک و تەقەمەنی و لۆجستی و تەکنەلۆژی بۆ بەرخۆدان دابین بکرێت.

-بژاردە سەربازییەکان بۆ گەیاندنی هاوکارییە مرۆییەکان و دامەزراندنی ئاگربەست دەبێت تاوتوێ بکرێن، هەروەها ئۆپڕاسیۆنی ئاشتیپارێزیش دەست پێبکرێت.

بەگوێرەی بڕیارە نێودەوڵەتییەکان، دەبێت گوشار بخرێتە سەر هاوپەیمانی خراپەکاری سەهیۆنی بۆ دڵنیابوون لە جێبەجێکردنی کردەیی ئەم بڕیارانە سەبارەت بە دامەزراندنی ئاگربەستی هەمیشەیی لە غەززە، کشانەوەی داگیرکەران لە غەززە، ئاوەدانکردنەوەی غەززە و گەیاندنی یارمەتییە مرۆییەکان."(İLKHA)