سەرجەم نوێنەرانی پەرلەمانی ویلایەتی ڤیەنای نەمسا بە کۆی دەنگ کۆمەڵکوژی هەڵەبجەیان بە "جینۆساید" ناساند.

پێشنیاری هاوبەشی سەوزەکان، پارتی سۆسیال دیموکراتی نەمسا (SPÖ)، نەمسای نوێ و کۆڕبەندی لیبراڵ (NEOS) بە کۆی دەنگ لە پەرلەمان پەسەند کرا.

پەرلەمانی ڤیەنا لەسەر ئەو بڕیارە لێدوانێکی دا. لە بەیاننامەکەدا ئاماژە بەوە کراوە کە ٣٥ ساڵ لەمەوبەر لە هێرشی گازی کیمیایی سەدام حوسێن پێنج هەزار کورد کوژراون.

بێریڤان ئەسڵان، جێگری پارتی سەوز، کە لە هەژماری تایبەتی خۆی لە سۆشیال میدیا لێدوانێکی سەبارەت بەو بڕیارە دا، بڵاویکردەوە، "بۆ یەکەمجار لە مێژووی سیاسی نەمسادا، بە دەستپێشخەریی من تاوانێکی جەماوەری دژ بە کورد بە "جینۆساید" ناسێندرا، دوێنێش هێرشی گازی ژەهراوی لە هەڵەبجە لە پەرلەمانی ڤیەنا لەلایەن هەموو لایەنەکانەوە.بە کۆی دەنگ بە "جینۆساید" ناسێندرا."

ئەو هێرشە نامرۆڤانەیە کە بە ناوی "کۆمەڵکوژی هەڵەبجە" لە مێژوودا تۆمارکرا، لە ١٦ی ئازاری ١٩٨٨ بە فەرمانی سەدام حوسێن زیاتر لە ٥ هەزار کەسی کوشت کە زۆربەیان ژن و منداڵ بوون.(İLKHA)