ئێران ڕەزامەندی دەربڕی لەسەر ئەنجامدانی خولی چوارەمی دانوستان لەگەڵ ئەمریکا لە ١١ی ئایار لە عومان بۆ چارەسەرکردنی قەیرانی بەرنامە ئەتۆمییەکەی.

بە ڕاپۆرتی ئاژانسی هەواڵی تەسنیم، ئەندامێکی تیمی دانوستانکاری ئێران زانیاری سەبارەت بە دانوستانەکان لەگەڵ ئەمەریکا دا.

ئەو بەرپرسە باسی لەوە کرد کە تاران پێشنیاری وەزیری دەرەوەی عومانی بۆ ئەنجامدانی خولی چوارەمی دانوستانەکانی ڕۆژی یەکشەممە پەسەند کردووە.

بە وتەی ئەو سەرچاوەیە، ئەم دانوستانانە تەنیا سەبارەت بە بواری ئەتۆمی و هەڵگرتنی گەمارۆکانی سەر ئێران دەبێت.

ئەمریکا و ئێران ٣ خولی دانوستانیان بە نێوەندگیری عومان ئەنجام داوە بۆ چارەسەرکردنی قەیرانی بەرنامە ئەتۆمییەکەی ئێران. خولی یەکەم لە ١٢ی نیسان لە شاری مەسقەت و قۆناغی دووەم لە ١٩ی نیسان لە ڕۆما و قۆناغی سێیەمیش لە ٢٦ی نیسان، هەروەها لە شاری مەسقەت بەڕێوەچوو. شاندی ئێران بە سەرۆکایەتی عەباس عێراقچی وەزیری دەرەوەی ئێران و شاندی ئەمریکاش بە سەرۆکایەتی ستیڤن ویتکۆف نوێنەری تایبەتی سەرۆک کۆماری ئەمریکا دانوستانی ناڕاستەخۆیان ئەنجام دایەوە.

بەدر ئەلبوسەیدی، وەزیری دەرەوەی عومان، ڕۆژی ١ی ئایار رایگەیاند، خولی داهاتووی دانوستانەکانی ئەمریکا و ئێران کە بڕیاربوو لە ٣ی ئایاردا بەڕێوەبچێت، بە "هۆکاری لۆجستی" دواخراوە.(İLKHA)