ڕاوێژکاری ڕێبەری ئێران جەختی کرد کە ئێران وێڕای رووسیا یان بەبێ ئەو پێش بە کردنەوەی کۆریدۆری ئەمریکایی لە قەوقاز دەگرێت، چونکە ئەو کۆریدۆرە هەڕەشەیە بۆ سەر ئاسایشی ناوچە و نەخشەی ژێئۆپۆلیتیکیی دەگۆڕێت.

عەلی ئەکبەر ویلایەتی، ڕاوێژکاری ڕێبەری ئێران لە کاروباری نێودەوڵەتی سەبارەت بە هەنگاوی دۆنالد ترامپ، سەرۆک کۆماری ئەمریکا لەبارەی کۆریدۆری "زەنگەزوور" و پاگەندەی بۆ بە کرێگرتنی ئەو ڕێڕەوگە بۆ ماوەی ٩٩ ساڵ، وتی، "ئایا قەوقازی باشووریی ناوچەیەکی بێ خاوەنە کە ترامپ بەکرێی دەگرێت؟ قەوقاز یەکێکە لە هەستیارترین خاڵە جوگرافییەکانی دونیا و دەبێتە گۆڕستانێک بۆ دارودەستەی ترامپ."

ناوبراو سەبارەت بە هەڵوێست و دژایەتی هەمیشەیی ئێران لەگەڵ پیلانی کردنەوەی کۆریدۆری زەنگەزوور، جەختی کرد، "ئەو کۆریدۆرە پێگەی ژێئۆپۆلیتیکی ناوچە دەگۆڕێت و شوێن‌گۆڕکێ بە سنوورەکان دەکات و بۆ دابەشکردنی ئەرمەنستان داڕێژراوە. ئینجا کاتێک تورکیا و ئازەربایجان کاتی خۆی پێداگربوون لە کردنەوەی ئەو کۆریدۆرە، هێزی چەکداریی ئێران بە بەڕێوەبردنی مانۆڕگەلێکی سەربازی نیشانی دا کە پێداگرە لە پێشگری لە پێشخستنی ئەو پیلانە."

ویلایەتی بیری هێنایەوە کە بەکرێگرتنی کۆریدۆر لە لایەن وڵاتێکی تر، قسەیەکی ساویلکانەیە و ترامپ خۆی لە ساویلکەیی داوە، وتیشی، "پلانی کردنەوەی ئەو کۆریدۆرە دابەشبوونی ئەرمەنستانی بەدواوەیە و بێگومان بەرەوڕووی ناڕەزایەتی خەڵکی ئەرمەنستان دەبێتەوە و ئێرانیش وێڕای رووسیا یان بەبێ ئەو، پێش بە کردنەوەی کۆریدۆری ئەمریکایی لە قەوقاز دەگرێت، چونکە ئەو کۆریدۆرە هەڕەشەیە بۆ سەر ئاسایشی ناوچە و نەخشەی ژێئۆپۆلیتیکیی دەگۆڕێت."

ناوبراو بە ئاماژە بە نیوەبەستراوەبوونی دەریای قەزوین و گواسترانەوەی وزە لەو دەریایە بەبێ ڕەزامەندیی هەموو وڵاتانی ناوچە، نامومکینە، ڕایگەیاند، "ئەو کۆریدۆرە نەک هەر ڕێڕەوگەیەکی بازرگانی، بەڵکوو پیلانێکە لە دژی ئێران هەندێک وڵاتی دراوسێ و جگە لە تورکیا، وڵاتانی دیکەی ناتۆش دەیانەوێ بەو فێڵە بێنە ناوچەوە و خود ناتۆ وەک مارێک دەیەوێ بخزێتە نێوان ئێران و ڕووسیا؛ بەڵام ئێران ڕێگەی ئەو کارەی پێ نادا."

ناوبراو بە ئاماژە بەوەی کە پەیوەندیی نەخجەوان و باکۆ پێویستی بە کۆریدۆر نییە و ئەوان دەتوانن لە خاکی ئێران بۆ پەیوەندی کەڵک وەربگرن و ڕاشیگەیاند، "هاوکێشە و پەیوەندییەکانی ئەو ناوچەیە تەنیا بە ئەرمەنستان و ئازەربایجان نابەسترێتەوە، بەڵکوو گۆڕانی ژێئۆپۆلیتیکی لە ناوچەی سنوورەکانی ئێرانیشی بەدواوە دەبێت، کەواتە ئێمە مافی خۆمانە بە هەموو هێزەوە بەرگری لە بەرژەوەندییەکانی خۆمان بکەین."

ویلایەتی لە درێژەدا باسی لە گۆڕانکارییەکانی لوبنان و بڕیاری دەوڵەتی لوبنان بۆ چەکدانانی حزب الله بە پیلانی ئەمریکا و رژیمی سەهیۆنی کرد و وتی، "ئەوە یەکەمجار نییە ئەو جۆرە پیلانە دژە لوبنانیانە ئاراستە دەکرێت، بەڵام هەر وەک ڕابردوو، بێ ئەنجام دەبێت و بەرخۆدان هەمبەر بەو پیلانە دەوەستن.

کاتێک بەرخۆدان ئیمکانات و هێزی ئێستای نەبوو، شکستی بەو پیلانانە هێناوە، ئێستا کە بەهێزترە و پاڵپشتیی خەڵکی هەیە، بێ گومان ناهێڵێت خەونی ئەمریکی-سەهیۆنی بۆ هێنانە سەرکاری جۆلانێکی تر وەدی بێت و لوبنان هەمیشە دژ بەو خەونانە وەستاوە و دەوەستێت."(İLKHA)