ئەمجەد بەشکار، خاوەنی دکتۆرا لە زانستە سیاسییەکان و پەیوەندییە نێودەوڵەتییەکان، جەختی کردەوە کە دیمەنە ترسناکەکانی تەرمی ئەو دیلە فەلەستینیانەی کە داگیرکەرانی سەهیۆنی لە ڕۆژانی ڕابردوودا ڕادەستی بەرخۆدانیان کردوونەتەوە، نیشاندەری سیاسەتە فاشیستییەکانی داگیرکەرانی سەهیۆنییە.

بەپێی ڕاپۆرتی ناوەندی ڕاگەیاندنی فەلەستین، ئەمجەد بەشکار، خاوەنی دکتۆرا لە زانستە سیاسییەکان و پەیوەندییە نێودەوڵەتییەکان وتی، "ئەم ڕەفتارە لە ڕووی مێژووییەوە لە یۆنانییەکان، فینیقییەکان و هەندێک لە هێزە داگیرکەرەکانی سەردەمی هاوچەرخدا بینراوە، کە هەموویان هەوڵیان داوە بۆ دەرخستنی زاڵبوون و دروستکردنی ترس لە لایەنی بەرامبەردا. بەڵام دەرەنجامەکەی تەواو جیاواز بووە، چونکە تەرمی شەهیدەکان شایەتحاڵی زیندوون لەسەر ڕەفتارە فاشیستییەکانی داگیرکەرانی ئیسرائیل، کە تەنانەت ڕێز لە مردووەکانیش ناگرن و هەموو پەیماننامە و پێوەرە ئەخلاقییە نێودەوڵەتییەکان پێشێل دەکەن."

بەشکار هەروەها وتی، "ئەو دیمەنانەی کە شوێنی زنجیری تانکەکان بەسەر تەرمی ڕۆڵەکانی گەلی فەلەستینەوە نیشان دەدەن، لە سەرووی تێگەیشتنی مرۆڤەوەیە لە ڕەفتارە فاشیستییەکانی ئیسرائیل، و بەستنەوەی دەست و چاوی دیلەکان پێش کوشتنیان، نیشاندەری ئەشکەنجە و ئازارێکی درێژخایەنیانە."

ئەم شارەزایە فەلەستینییە لە بەردەوامی وتی، "٧ی ئۆکتۆبەر کۆتایی بەو گێڕانەوە ئیسرائیلییە هێنا کە لە جیهاندا بڵاوکرابووەوە و ساختەیی ئەم گێڕانەوەیەی لەبەردەم ڕای گشتیی جیهاندا ئاشکرا کرد."

بەشکار لە کۆتاییدا جەختی کردەوە، "ئەم دیمەنانە شایەتحاڵن لەسەر تاوانەکانی داگیرکەران و هەروەها بەڵگەی یەکلاکەرەوەن بۆ ئامادەبوونی نەتانیاهۆ لە دادگا نێودەوڵەتییەکان. هەروەها هۆشداری دەدات لە بەردەوامیی پێوەرە دووفاقییەکان لە مامەڵەکردن لەگەڵ تاوانەکانی ئیسرائیلدا، چونکە بەردەوامیی ئەم ڕەوتە، ئەوەی ماوەتەوە لە باوەڕپێکراویی ئەخلاقیی دامەزراوە دادوەرییە نێودەوڵەتییەکان، لەناودەبات."(İLKHA)