کازم غەریب ئابادی، جێگری وەزیری دەرەوەی ئێران لە لاپەڕەی تایبەتی خۆی سەبارەت بە دانوستان لەگەڵ ٣ وڵاتی ئەوروپی لە ئیستانبوول وتی، "ڕێکەوتن کرا بەردەوام بین."

کۆبوونەوەی نێوان ئێران و ٣ وڵاتی ئەوروپی کە بریتین لە فەڕەنسا، بەریتانیا و ئەلمانیا کۆتایی هات.

کازم غەریب ئابادی، جێگری وەزیری دەرەوەی ئێران لە لاپەڕەی تایبەتی خۆی لە تۆڕی کۆمەڵایەتی راگەیاند، "من و تەخترەوانچی گفتوگۆیەکی جددی و ڕاشکاوانە و وردمان لەگەڵ سەرکردە سیاسییەکانی ٣ وڵاتی ئەوروپی/یەکێتی ئەوروپا کرد.

دوایین پێشهاتەکانی پەیوەست بە هەڵگرتنی سزاکان و پرسی ئەتۆمی تاوتوێ کران و پێداچوونەوەیان بۆ کرا."

هەروەها وتی، "وێڕای ڕەخنەی جددی لە هەڵوێستەکانی ئەو وڵاتانە سەبارەت بە شەڕی ئەم دواییە دژی گەلەکەمان، هەڵوێستەکانی خۆمان ڕوونکردەوە، لەنێویاندا لەسەر ئەوەی پێی دەوترێت میکانیزمی سناپباک.

هەردوولا بە بیرۆکەی تایبەتەوە هاتنە کۆبوونەوەکە، کە لایەنە جۆراوجۆرەکانی لێکۆڵینەوەیان لەسەر کرا. ڕێککەوتن کرا کە ڕاوێژکارییەکان لەسەر ئەم بابەتە بەردەوام بن."(İLKHA)