حەماس ڕێبازی ئەرێنی خۆی بۆ دانوستانەکان بۆ ڕێککەوتنێکی گشتگیر راگەیاند و رایگەیاند کە دەستڕاگەیشتن بە هاوکاری مرۆیی بێ بەربەست و ئاگربەستی هەمیشەیی لە ئەولەویەتی سەرەکییەکانیدایە.

حەماس بەیاننامەیەک سەبارەت بە دانوستانەکان بە ئامانجی کۆتاییهێنان بە هێرشە بەردەوامەکانی سەر غەززە و گەیشتن بە ئاگربەستێکی هەمەلایەنە بڵاو کردەوە.

لە راگەیەندراوەکەدا جەخت لەوە کراوەتەوە کە بزووتنەوەکە بە جددی و بەرپرسیارانە کار بۆ کەمکردنەوەی ئازارەکانی گەلەکەی و زامنکردنی ئازادییان دەکات.

لە راگەیەندراوەکە هاتووە، "ئێمە سەرقاڵی هەوڵێکی چڕوپڕ و بەرپرسیارین بۆ گەیشتن بە ئەنجامێکی سەرکەوتووانەی پرۆسەی دانوستانەکانی ئێستا، بە ئامانجی کۆتاییهێنان بە هێرشەکان دژی گەلەکەمان، دەستەبەرکردنی گواستنەوەی سەلامەت و ئازادانەی یارمەتییە مرۆییەکان و گەیشتن بە ڕێککەوتنێکی هەمەلایەنە بۆ کەمکردنەوەی قووڵبوونەوەی قەیرانی مرۆیی لە غەززە."

هەروەها حەماس رایگەیاند کە نەرمی نیشان دەدەن بۆ ئەوەی بەشداری لە پێشکەوتنی پرۆسەکەدا بکەن و ڕەزامەندییان دەربڕیوە لەسەر ئازادکردنی ١٠ ئەسیر.

بەڵام بزووتنەوەکە ئاماژەی بەوەدا کە هەندێک بابەتی سەرەکی لەسەر مێزی دانوستان ماونەتەوە. سەرەکی لەنێو ئەمانەدا بریتین لە:

"گواستنەوەی بێ بەربەستی هاوکارییەکان بۆ ناوچەکە.

کشانەوەی تەواوەتی سوپای سەهیۆنی لە غەززە.

دامەزراندنی ئاگربەستێکی هەمیشەیی و پارێزراو."

لە درێژەی بەیاننامەکەدا ئاماژە بەوە کراوە کە هەڵوێستی سەرسەختانە و زۆرەملێی رژێمی سەهیۆنی کۆمەڵێک بەربەستی دروست کردووە، بەڵام سەرەڕای ئەمەش حەماس بە هاوکاری لەگەڵ ناوبژیوانان، بە ڕۆحێکی جیددی و ئەرێنی بۆ پێشخستنی پرۆسەکە هەڵسوکەوت دەکات.

حەماس هەروەها جەختی لەوە کردەوە کە واز لە داواکارییە ڕەواکانی گەلی فەلەستین بۆ ئازادی و ئاسایش و ژیانێکی شکۆمەندانە ناهێنن.(İLKHA)